Gwo Defi ki Devan Nouvo Direkte Jeneral OAVCT
Mèkredi 19 fevriye, Pierre Jean Raymond André te enstale kòm nouvo Direkte Jeneral OAVCT. Nominasyon li rive nan yon moman kote OAVCT ap fè fas ak plizyè defi kritik ki mande solisyon rapid ak efikas. OAVCT, kòm yon enstitisyon leta, ta dwe jwe yon gwo wòl nan batay kont ensekirite kriminèl epi ede nan prevansyon sekirite woutyè.
Yon nan pi gwo defi nouvo DG a se modènize OAVCT pou mete li an akò ak nivo teknolojik aktyèl la. Sistèm administratif la bezwen yon refòm fon nan objektif pou amelyore kalite sèvis yo, redwi reta ak mete lòd nan fonksyònman òganizasyon an. Se pa sèlman amelyorasyon administratif ki nesesè, men tou kwape koripsyon ki mine konfyans popilasyon an nan enstitisyon an.
Pierre Jean Raymond André pwomèt pou l travay di pou remanbre OAVCT, mete estrateji anplas pou ranfòse sekirite woutyè epi asire ke fonksyonman enstitisyon an vin pi transparan. Plizyè aktè nan sektè asirans lan ap tann gwo chanjman, e anpil moun swete ke nouvo DG a ap gen volonte ak kouraj pou l mete refòm sa yo an aplikasyon.
Depi enstalasyon li, li deja mete aksan sou nesesite pou travay kole kole ak anplwaye yo ak tout lòt sektè ki konsène pou OAVCT ka fonksyone pi byen epi reponn ak bezwen sitwayen yo. Reta administratif yo dwe diminye, sèvis yo dwe modènize, ak sekirite woutyè dwe yon priyorite.
Nouvo direksyon OAVCT la gen yon wout long devan li. Siksè li pral depann de kapasite li pou mete refòm estriktirèl anplas epi fè OAVCT tounen yon modèl efikasite ak transparans nan fonksyònman li.
