Premye Minis Ayiti, Garry Conille, mete yon fren sou aksyon Minis Sante Piblik la, Georges Fils Brignol, ki t ap fè rekritman ak pwomosyon san otorizasyon, sa ki kapab mete finans piblik yo an danje, dapre PM nan.
Nan yon lèt ofisyèl Conille te voye bay Minis la, li fè konnen ke aksyon sa yo se vyolasyon enstriksyon gouvènman an te bay nan Sikyilè No 001 dat 25 jen 2024 la.
Premye Minis la te raple Minis la ke tout rekritman ak pwomosyon ki fèt san otorizasyon se pa sèlman yon pwoblèm administratif, men tou li mete an danje batay kont kòripsyon gouvènman an. Li te ajoute ke aksyon sa yo riske mete an mal finans piblik yo ak kredibilite gouvènman an, epi li avèti Minis la ke sa kapab mennen nan sanksyon legal.
Garry Conille ensiste sou enpòtans solidarite gouvènman an nan lit kont kòripsyon, epi li fè Minis la konnen tout aksyon ki fèt deyò kad legal la ap gen konsekans grav.
