SPNH 17: Sendomeng ak Etazini gen yon pati nan reskonsablite ensekirite Ayiti. SPNH 17 mande pou laperèz ak ensekirite tounen bagay ki pase. Yo mete presyon sou tout sektè nan sosyete a pou pran responsabilite yo epi fè reparasyon pou tout viktim ki soufri anba ensekirite sa a, sitou fanmi polisye ki sakrifye lavi yo pou sekirite peyi a.
Nan yon deklarasyon frapan sou rezo sosyal Twitter, Sendika Polis Nasyonal Ayiti (SPNH 17) fè konnen ke Etazini ak Repiblik Dominikèn pa inosan nan klima ensekirite ki ap dechiré Ayiti jodi a. Nan mesaj la, sendika a denonse konplisite entènasyonal nan sikilasyon ilegal zam ki kontinye pote lanmò, mizè, ak dezolasyon nan peyi a.
Arestasyon militè ak polisye dominiken: yon egzanp klè
SPNH 17 raple ke arestasyon militè ak polisye dominiken pou vòl 900,000 bal reprezante yon prèv solid ki montre enplikasyon antènasyonal nan sitiyasyon grav Ayiti ap travèse. Zam ak minisyon sa yo pase pa fwontyè, pò ak ayewopò Ayiti, epi yo rive nan men gang ame, sa ki rann lavi popilasyon an pi difisil chak jou.
Yon apèl pou aksyon imedya
Sendika a lanse yon apèl dirèk bay otorite yo, espesyalman CSPN (Konsèy Siperyè Polis Nasyonal), CPT (Konsèy Prezidansyèl pou Tranzisyon an), ak sosyete sivil la pou:
- Denonse piblikman wòl Etazini ak Repiblik Dominikèn nan fè ensekirite vin yon planifikasyon sistematik.
- Mande reparasyon pou domaj Ayiti sibi akoz sitiyasyon sa a.
- Redouble efò pou pran kontwòl fwontyè, pò ak ayewopò peyi a ki rete vilnerab devan trafik ilegal.
Solitid ak fanmi polisye viktim yo
SPNH 17 mete aksan sou solidarite li avèk fanmi polisye ki viktim nan sa yo rele yon « ensekirite planifye ». Yo mande jistis pou chak viktim epi yo repete angajman yo pou goumen pou kondisyon lavi ak sekirite miyò nan sosyete a.
Yon rapèl sou konplisite entènasyonal
Deklarasyon SPNH 17 la sèvi kòm yon rapèl ki fè Ayisyen sonje enpak negatif zak entènasyonal sou lavi pèp la. Si ensekirite a gen rasin nasyonal, sendika a klè ke wòl entènasyonal pa ka inyore, sitou nan zafè trafik zam ak mank kontwòl ki gen nan enfrastrikti estratejik peyi a.
